Hans van Pluijm atimuliwa Yanga, ukata wa fedha wadaiwa ndio sababu

Hatimaye aliyekuwa kocha wa klabu ya soka ya Yanga na mkurugenzi wa ufundi wa klabu hiyo Hans van Pluijm amefutwa kazi wiki hii.

Akiongea na mtandao wa Goal, katibu mkuu wa timu hiyo Boniface Mkwasa amesema sababu za kukatisha mkataba na Pluijm zimekuja kutokana na tatizo la kifedha linaloikumba klabu hiyo baada ya Mwenyekiti wake Yusuph Manji kuwa katika kipindi kigumu kwa sasa.

“Uongozi wa juu umeamua kusitisha kibarua cha Mkurugenzi wetu wa ufundi, kutokana na ukata wa fedha ambao unatukabili hivi sasa. Ni kitu ambacho kinaumiza kutokana na mchango wa Pluijm kwenye kikosi chetu lakini hatuna namna,” amesema Mkwasa.

Pluijm aliifundisha Yanga kwa vipindi viwili tofauti huku akiisaidi timu hiyo kushinda mataji kadhaa ikiwemo mawili ya ligi kuu, Ngao za hisani (2), Kombe la FA mara moja na kufanikiwa kufuzu hatua ya makundi ya michuano ya Kombe la Shirikisho Africa CAF.